HOY EMPIEZA TODO. Bertrand Tavernier

"Hoy empieza todo" é un filme dirixido polo grandísimo director francés Bertrand Tavernier (tamén actor, escritor e produtor) que ten como título orixinal "Ça commence aujourd'hui". 

Estreouse en 1999 e conta a historia de Daniel Lefebvre, un director de escola infantil nun barrio marxinal dunha vila mineira do norte de Francia, na que o 30% da poboación está no paro. Mentres este incansable traballador intenta buscar saídas para as familias, esforzándose en implicar á comunidade educativa, o único que recibe a cambio é que o seu labor docente sexa cuestionado.

Reflexa unha realidade moi próxima á que nos está tocando vivir aquí nestes tempos de crise financeira, económica e, sobre todo, de ideas. E é de agradecer (moito) que un director de tales dimensións, puxera o foco sincero, deste xeito, na educación, un aspecto tantas veces esquecido a pesares do seu valor suposto como ben de interese común. 

Considerada pola crítica unha obra mestra do sétimo arte, é ademais unha peli honesta, emotiva, directa, realista e fermosa que serve para poñer de manifesto e comprender que, do entendemento de todos os axentes educativos (escola, familias, comunidade) saen os verdadeiros bos resultados... e ao dicir "verdadeiros" xa deberíades entender que non me refiro aos do Informe PISA.

Premio da Crítica Internacional do Festival de Berlín e Premio do Público no Festival de San Sebastián.

Aínda que está recomendada para maiores de trece anos, moitos alumnos/as de terceiro ciclo de Educación Primaria están xa preparados para vela. Por suposto, os adultos non deberían deixala pasar.