DÍA INTERNACIONAL DO LIBRO INFANTIL

Boas, xentiña!

Con este título tan fermoso "As historias son ás que nos axudan a remontar o voo cada día" acabamos de celebrar o Día Internacional do Libro Infantil e Xuvenil o pasado 2 de abril. 

O texto que segue é de Richard Van Camp, un escritor e contacontos canadense moi afamado, que foi o encargado este ano de facer a mensaxe.

 

Richard Van Camp

 

Ler é liberdade. Ler é respirar.

 

Ler permite que vexas o noso mundo con ollos diferentes e convídate a habitar mundos que nunca vas querer deixar.

 

Ler permítelle ao teu espírito soñar.

 

Seica os libros son amigos para toda a vida, eu acredito niso.

 

A plenitude do teu universo só medra cando les.

 

As historias son ás que nos axudan a remontar o voo cada día, xa que logo busca libros que lle falen ao teu espírito, ao teu corazón, á túa mente.

 

As historias son menciña. Curan. Reconfortan.

 

Inspiran. Ensinan.

 

Benditos sexan os narradores, e os lectores, e os oíntes. Benditos sexan os libros. Eles son a menciña para un mundo mellor, máis luminoso.

 

Mahsi cho. Moitas grazas.

 

AUTOR: RICHARD VAN CAMP

TRADUCIÓN: MERCEDES PACHECO